$ 442.05 € 474.14 ₽ 4.74
Жекелеген әкімдер сатып алу кезінде бір ғана жұмыстың құнына тоқталып (3000 АЕК-тен аспайтын), жұмыстың біртектілік жайлы қойылатын талаптарын әдейі елемеген.
ШҚО Шемонаиха ауданының прокурорлары 3 әкімді әкімшілік жауаптылыққа тартты, деп хабарлайды Skifnews.kz ақпарат порталы.
Облыс прокуратурасының хабарлауынша, мемлекеттік сатып алу туралы тікелей шарттарды заңсыз жасасу фактілері анықталды.
Қолданыстағы мемлекеттік сатып алу туралы заңнама егер біртекті тауарлардың, жұмыстардың, көрсетілетiн қызметтердің құндық мәндегі жылдық көлемі АЕК-тің 3 000 еселенген мөлшерінен аспаса, аудандық маңызы бар қалалар, ауылдар, кенттер, ауылдық округтер әкімдері аппараттарының осындай біртекті тауарларды, жұмыстарды, көрсетілетiн қызметтерді бір көзден сатып алуға мүмкіндік береді («Мемлекеттік сатып алу туралы» Заңының 39-бабы 3-тармағы 42-тармақшасы).
Жекелеген әкімдер сатып алу кезінде бір ғана жұмыстың құнына тоқталып (3000 АЕК-тен аспайтын), жұмыстың біртектілік жайлы қойылатын талаптарын әдейі елемеген. Мәселен, Шемонаиха қаласы әкімінің аппараты аталған әдіспен қысқы жол жөндеу жұмыстарын жүргізуге жалпы сомасы 27,2 млн. теңгеге 3 шарт жасасқан. Жұмыстың сипаты біртекті, бірақ бұл ретте жалпы құны 3000 АЕК-тен асқанын ескере отырып, бұл сатып алулар бәсекелестік ортада жүзеге асырылуы тиіс болатын. Осындай заң бұзушылықтарға Зевакин және Вавилон ауылдық округтерінің әкімдері де жол берген», – делінген облыс прокуратурасының ақпаратында.
Прокурорлық қадағалау актісі бойынша Шемонаиха қаласы, Зевакин және Вавилон ауылдық округтерінің әкімдері ҚР ӘҚБтК 207-бабының 11-бөлігі бойынша әрқайсысы 100 АЕК мөлшерінде айыппұл түріндегі әкімшілік жауапкершілікке тартылды.
