Қазақстан аумағының басым бөлігінде ауа райының тұрақсыз сипаты сақталады.
«Қазгидромет» РМК баспасөз хатшысы Алина Ысмағұлова еліміздің 7 пайыз аумағы қар жамылып жатқанын айтты, деп хабарлайды Skifnews.kz ақпарат порталы.
Қазақстан аумағының қармен жабылған ауданы 7 пайызды құрайды. Синоптикалық болжамға сәйкес, 13-19 сәуірде Қазақстан аумағының басым бөлігінде ауа райының тұрақсыз сипаты сақталады. Жауын-шашын жаңбыр түрінде болады деп болжануда. Қазақстанның солтүстік-батысында, солтүстігінде, шығысында, орталығында - 14-15 сәуірде Ұлытау, Ақтөбе, Солтүстік Қазақстан облыстарында, 14-16 сәуірде Қарағанды облысында, 14-17 сәуірде Қостанай облысында, 15-16 сәуірде Ақмола, Павлодар облыстарында, 16-19 сәуір Шығыс Қазақстан облысында түнде жаңбыр қарға ұласуы мүмкін. Қатты жаңбыр 13-14 және 16 сәуірде Түркістан облысында, 14-16 сәуірде Алматы, Жамбыл облыстарында, 16 сәуірде Жетісу облысында болады деп болжануда, - деді ол Орталық коммуникациялар қызметіндегі брифингіде.
Оның айтуынша, жауын-шашын еліміздің батысында, солтүстік-батысында, оңтүстігінде 17 сәуірден бастап, республиканың солтүстігінде 19 сәуірден бастап тоқтайды. Сонымен қатар келесі аптадан бастап еліміздің барлық аумағында күн жылына бастайды.
14 сәуірге «Қазгидромет» жариялаған ауа-райы болжамы бойынша, еліміздің басым бөлігінде жаңбыр жауып, кей өңірлерде найзағай ойнап, тұман түсіп, екпінді жел соғады.