Шымкентте инсульт алған адамды дәрігерлер мас деп ойлап, көмек көрсетпеген

Шымкентте миына қан құйылған науқасты дәрігерлер мас деп ойлап, көмек көрсетуден бас тартқан, деп хабарлайды Skifnews.kz ақпарат порталы.

Azattyq Ruhy сайтының жазуынша, жолда өзін жайсыз сезінген әйелді көшедегі бейтаныс адамдар №1 ауруханаға жеткізген. Бірақ науқастың құсып жібергенін көрген кезекші дәрігер ішімдікке тойып алған деп, палатаға кіргізіп, ұйықтатып тастаған.

Бірінші көмек көрсетілмеген. Кейін кезекші дәрігерге барсам, «рентгенге түсірдік, қол-аяғы, басы сау, үйге алып кете беріңіз, жай ғана мас, ұйықтап жатыр» деді. Қалай енді бұл? «Уланған шығар, иісі жоқ» деп айтсам да, көңіл аудармады. Инсульт алған Қалдыкүл Мамытова палатада екі сағаттай жатып қалған. Тек күйеуі келген соң ғана токсикология бөлімшесіне апарып тексертіпті. Тек сонда ғана инсульт белгілерін анықталған. Дереу өзге ауруханаға апарып, басына ота жасалғанша, арада алты сағат уақыт өтіп кетті, - дейді науқастың күйеуі Құттымұрат Азтаев.

Миына көп қан құйылған 45 жастағы науқас комаға түсіп кеткен. КТК хабарлағандай, әйелінің мүлде ішімдік ішпейтінін айтқан күйеуі ісіне салғырт қараған дәрігердің үстінен полиция мен прокуратураға шағым түсірді. Ал ауырып келген адамды «мас» деп ойлаған дәрігер науқастың құсқанын көріп, қате жормал жасадым деп ақталып отыр.

Арбамен әкелді. Үсті-басы бәрі құсық. Ішкен шығар деп ойладым. Анализінен ештеңе шықпады. Анализ кейін көрсетеді. Сөйтіп токсикологияға тапсырып келіңдер дедім. Болды, басқа ештеңе болған жоқ, - дейді нейрохирург Қанат Мырзабаев.