Вандализм үшін жауап береді: Қазақстандық турист Италияда тарихи ескерткішке атын ойып жазған

Ғимарат – б.з.д. II ғасырға тән сирек кездесетін ежелгі тұрғын үй.

Италиядағы Помпеи археологиялық паркіндегі ежелгі Цеев үйінің қабырғасына "ALI" сөзін жазған қазақстандық ұсталды, деп хабарлайды Skifnews.kz ақпарат порталы inbusiness.kz сайтына сілтеме жасап.

Ер адам келген залалды өтейді.

Сенбі күні таңертең қауіпсіздік қызметкерлері Помпеи археологиялық паркінде орналасқан Цеев үйіндегі ашық сылаққа ALI әріптерін ойып жазған Қазақстаннан келген туристі ұстаған. Бұл жайында Euronews-ке мұражайдың пиар-кеңсесі хабарлаған.

Оқиға туралы парк жанында орналасқан стационарлық карабинер постына хабарланып, артынша бұзақы ұсталды.

Турист сәулет ескерткішіне келген залалдың орнын толтыруы керек, ал оның нақты сомасы техникалық сараптама жүргізілгеннен кейін белгілі болады.

1913-1914 жылдары қазылған Цеев үйі - соңғы саманит кезеңіндегі (б.з.д. II ғасыр) ежелгі тұрғын үйдің сирек кездесетін мысалдарының бірі.

Үйді Магистрат Луций Цей Секунд иеленген деп санайды, бұған үйдің сыртқы қасбетінде жазылған жазу дәлел.

Ақ сылақпен және текше ұшарбастары бар биік бағаналы үйдің қасбеті сол кезеңдегі беделді адамның үйі болуы керек дегенді білдіреді.