10 жылдың ішінде Қазақстан мемлекет ретінде жоғалып кетуі мүмкін – Асхат Асылбеков (ВИДЕО)

Мемлекеттің дамуына үлес қосу үшін билікке, таққа таласудың қажеті жоқ. Бұл туралы саясаттанушы, журналист Асхат Асылбеков «Qasqa jol» каналына берген сұхбаты барысында айтты, деп хабарлайды Skifnews.kz ақпарат порталы.

Оның айтуынша, өзі Қаңтар оқиғасынан кейін әлеуметтік мемлекет құра аламыз, қарсы шығып жатқан күштерді жеңе аламыз деп сенген. Алайда жағдай басқаша.

Бағдарлама қонағы тіпті, құр сөз емес, дәлел келтіре отырып сөйледі. Қорқынышты болжаммен қатар, адам сенгісіз фактілер және бұрын еш жерде айтылмаған оқиғалардан құралған сұхбат берді.Елдегі жемқорлық туралы сөз қозғады.

«30 жыл бойы Қазақстанды кім тонады? Қазақстанды тонаған – қазақтар! Ал мәдениетті адам өз халқын тонамайды. Ал біздің олигархтар жыртқыш секілді халықты тонады. Енді бұлай жалғаса берсек, бірікпесек, 10 жылдың ішінде Қазақстан деген мемлекеттен айырылып қалуымыз мүмкін. Себебі біз егемендікті қадірлемейміз, өйткені, соғысқан жоқпыз. 

Сондықтан Үкімет коалициялық болуы керек. Осы ойды Тоқаев бірнеше рет айтты. Менің бір-ақ ғана арманым, мақсатым бар, ол – Қазақстанды егемен мемлекет ретінде сақтап қалу. Өйткені қауіп көп, өмір өзгерді, ешқандай кепіл жоқ. Сол үшін біз ешқандай тіл, ұлтаралық мәселені көтермеуіміз керек. Біздің жауларымызға сылтау бермеу керекпіз. Бірігу керекпіз, нағыз интерноциональды көп халықты, этносты мейірімді халық болу керек. Сонда ғана көршілермен сауда жасап, тату-тәтті тұруға болады», - деді Асхат Асылбеков.