Алматыда тұрғындарға үй алып беремін деп алдаған алаяқ сотталды

Алматыда үлескерлердің ақшасын иемденген алаяқ 6 жыл 8 ай мерзімге бас бостандығынан айырылды, деп хабарлайды Skifnews.kz ақпарат порталы. 

«2022 жылы «Flora City Stroy» ЖШС директоры «К» азаматы «instagram», «krisha.kz» әлеуметтік желілерінде құрылыс салуға рұқсат қағазынсыз «Lantana» және «Flora» ТК құрылысының басталуы туралы жарнама берген. Одан кейін «К» азаматы, сатып алушыларды алдау және олардың сенімін пайдалану жолымен алдын ала сатып алу және сату шарттарын жасап, 290 млн теңге мөлшеріндегі 34 үлескердің ақшасын иеленген», - деп хабарлады ведомстводан.

Материалдар сотқа дейінгі тергеп-тексеру жүргізу үшін Бостандық ауданының полиция басқармасына жолданды.

«21 маусым күні Бостандық аудандық сотының үкімімен «К» азаматы ҚР ҚК-нің 190-бабы 4-бөлігі 2-тармағымен (аса ірі мөлшердегі алаяқтық) кінәлі деп танылып, 6 жыл 8 ай мерзімге бас бостандығынан айырылды. Алынған учаскелер жәбірленушілердің залалын өтеу үшін сатылатын болады», - деді ведомство өкілдері.

Үкім заңды күшіне енген жоқ.

Алматы қаласының прокуратурасы азаматтарды жылжымайтын мүлікті сатып алу кезінде қырағы болуға және рұқсат беру, сондай-ақ құқық белгілейтін құжаттардың болуын тексеруге шақырады.