Журналист: Қазақ тілінің қадір-қасиетін қазақша сөйлейтін қазақтар ғана кетіріп жатыр

«Шетелдегі қазақ балалары» жобасының авторы әрі жүргізушісі Жанар Байсеміз қазақ тілінің қазіргі жағдайына алаңдаушылық білдірді, деп хабарлайды Skifnews.kz ақпарат порталы.

Оның пайымдауынша, екі сөздің біріне орысша қосып сөйлеу – сән емес. Бұл туралы тележүргізуші Instagram-дағы stories бөлімінде ойын ашық жазды.

«Блогерлер, коучтар, тағы басқалары «больым» деп көп айтып жүр. Менің больым дейді. Боль деген сөзді жан жарасы деп алсақ қалай болады? Жан жарасы — қандай әдемі сөз.

Қазақ тілінің қадір-қасиетін қазақша сөйлейтін қазақтар ғана кетіріп жатыр. Кезінде ауылдан шыққан қазақтар, тілі қазақша шыққан қазақтар. Мектепте, университетте қазақша оқыған қазақтар.

Екі сөздің біріне орысша сөз қосу — сән емес. Бұл — сорақылық, бұл надандық. Бұл — мәдениеттің төмендігі. Ойыңды орысша жеткізгің келсе, таза орысша сөйле. Қазақша айтқың келсе, таза қазақша айт. Құдай үшін, тіл тазалығын сақтайықшы», — деп жазды журналист.