«Адамның жүрегі дүниеге байланбау керек»: Нұрлан имам мәһр сұрау қазақтың салт-дәстүріне жат нәрсе екенін айтты

"Ырыскелді қажы" атындағы мешіттің бас имамы, теолог Нұрлан Байжігітұлы көпшілік арасында жиі талқыға түсетін мәһр үшін жат ағымдағы қыздармен сөзге келіп қалғанын айтты. Имам мәһрдің шариғатта бар дүние болғанымен, қазақтың салт-дәстүріне жат нәрсе екенін айтады, деп хабарлайды Skifnews.kz ақпарат порталы.

“Мәһр – шариғатта, дінімізде бар дүние, қыздың ақысы. Бірақ біздің дана, дара халқымыз қалыңмалмен, ата күші, ана сүті деп түрлі атаумен қыз балаға берген. Оны алған қыз тарапы оны баланы киіміне, дүние-жиһазына жұмсаған. Сол мәһр болады. Егер, Құдай сақтасын, ажырасып жатқан жағдайда қыз артынан келген бүкіл дүниені ешқашан тастап кетпей, өзімен бірге алып кетеді. Демек, ол мәһр”, – дейді Нұрлан Байжігітұлы. 

Имам осылайша, мәһрді қазақтың салтында жоқ дүние екенін айтқан соң өзіне жат ағым өкілдерінің шүйліккенін айтты.

“Теріс ағымдағы деп айта берейін, 1-2 қарындас маған қатты шүйлікті. “Неге бұлай айтасыз? Құдайдың әмірін бұзып тұрсыз” деп арабша мәселелерді алып келді. “Мәһр” не үшін беріледі?” деп сұрап едім “Ажырасып кетсек, бұл біздің 2-3 айлық тамағымыз болады” деп жауап берді. Өздері тұрмыс құрмаған екен. Содан “Бірінші, тұрмыс құрып ал. Сосын жақсы ниетте бол” дедім. “Ажырассам” деген не сөз? Адамның жүрегі дүниеге байланбау керек. Қазақтың құндылығы, қыз баланы өмірі, бағы түкке тұрмайтын дүниемен өлшенбейді”, – дейді дінтанушы.

Нұрлан имам мәһрді қазақ қоғамына соңғы жылдары шетелден араб дүниесін оқып келген азаматтардың алып келгенін айтады. Имам олардың шариғатта бар дүние екенін білгенімен, қазақтың ұлттық қағидадан бейхабар дейді. 

“Қазақтың өзінің ілімін оқымады, ақсақалдардың мектебінен, аналардың батасынан, қолынан өтпеді. Сол себепті “Мәһр беру керек, оның құны осынша” деп жиі айтып кетті. Бұған алданып жүрген жастарымыз бар. Біліңіздер, біздің салтымыз, дәстүріміз түгелдей шариғаттың талаптарын жапқан”, – дейді Нұрлан Байжігітұлы.

Сондай-ақ дінтанушы мәһрге биткоин сұраған қалыңдықтың некесін өзім қидым дейді. 

“Негізі олар бұрын үйленіп қойғандар. Жаныда сол кезде бала-шағасы отырды. Биткоинды келіншек қызық болсын деп сұрады. Бұл қалжың үшін жасалған еді. Бірақ не десе де, ерлі-зайыпты мұны өздері шешеді”, – дейді ол.