Барлық құқық бұзушылар әкімшілік жауапкершілікке тартылды.
Елордада вандализм актілерімен және қоғамдық тәртіпті бұзудың кез келген көріністерімен күресу бойынша тұрақты жұмыс жүргізілуде. Полицейлер кезекті вандалдарды тауып, жауапкершілікке тартты, деп хабарлайды Skifnews.kz ақпарат порталы Астана әкімдігінің ресми сайтына сілтеме жасап.
22 қазан күні сағат 21:30 шамасында 54 жастағы ер адам пәтердің электр сымдарын әдейі кесіп тастады, осылайша мүліктік зиян келтірді. Оның жеке басы анықталып, әкімшілік жауапкершілікке тартылды.
Осыған ұқсас жағдайлар 26 қазан күні сағат 16:10 шамасында болды. 43 жастағы астаналық мас күйінде автокөліктің алдыңғы әйнегін сындырып, бөтеннің мүлкіне қасақана зақым келтірді. Құқық бұзушы 5 тәулікке қамауға алу түрінде жауапқа тартылды.
23 қазан күні түнгі сағат 2-де 47 жастағы астаналық Нәжімеденов көшесінде қасақана бейнекамераға зақым келтірді. Құқық бұзушыға бөтеннің мүлкін бүлдіргені үшін 50 АЕК мөлшерінде айыппұл салынады.
Барлық құқық бұзушылар әкімшілік жауапкершілікке тартылды.
Жыл басынан бері Астанада еріктілер, белсенділер, белгілі спортшылар, қала тұрғындары қолдаған «Стоп, вандал» акциясы аясында профилактикалық жұмыстар жүргізілуде.
Акцияның мақсаты – вандализмнің кез келген көрінісін болдырмау және елордада тазалық пен тәртіпті сақтау.
Бөтеннің мүлкін қасақана бүлдіргені, жалпы пайдалану орындарын ластағаны, ғимараттар мен тұрғын үй-жайларды бүлдіргені үшін сот жыл басынан бері 260-тан астам адамды жазалады. Олардың барлығы жауапқа тартылды.
Вандализмнің алдын алу жұмыстары қалалық прокуратура мен полиция департаментінің үйлестіруімен жүргізіледі.