Дінмұхаммед Қонаев та әкеміздің ұстазы ғой. Ол кісіге де Алматыда бюст қойылған.
2 желтоқсанда Алматы облысы Кеген ауылында Заманбек Нұрқаділовке арналған ескерткіш-бюст қойылып, ас берілді. Nege порталына берген сұқбатында Қайрат Нұрқаділов әкесіне не себепті ескерткіш емес бюст орнатылғанын түсіндірді, деп хабарлайды Skifnews.kz ақпарат порталы.
Бюсттің ашылу салтанатынан кейін "Заманбек Нұрқаділовке еңселі ескерткіш орнатса да жарасар еді" деп пікір білдіріп жатқандар бар. Президенттің өзі "ескерткіш орнатылсын" деп тапсырма берген еді. Бастапқыда Заманбек Нұрқаділовке толыққанды ескерткіш қойылатыны айтылған. Алайда ол жоспар аяқасты өзгеріп кеткенін Қайрат Нұрқаділов айтып берді.
"Бюст орнатуды өзіміз қаладық. Оған бюджеттен қаржы бөлінген. Үлкен ескерткіш орнатуға шашамен 60 млн теңге кетеді. Ал бюджеттен бөлінген ақша – халықтың ақшасы. Халықтың ақшасын шашқымыз келмеді. Сол себепті, бюст орнатайық деген шешімге келдік. Биіктігі 5 метр болатын бюст қойылды. "Дінмұхаммед Қонаев та әкеміздің ұстазы ғой. Ол кісіге де Алматыда бюст қойылған. "Қонаевтан асырып, ескерткіш қоймайық" деген ойға тоқталдық. Әкем – саясаткер, сондықтан оған жарасып тұр. Ол – жазушы, ақын, батыр болса, онда ескерткіш орнатуға болар еді", – деп жауап берді Қайрат Нұрқаділов.
Айта кетейік, 2 желтоқсанда Алматы облысы Кеген ауданының орталығында мемлекет және қоғам қайраткері Заманбек Нұрқаділовке арналған ескерткіш-бюсттің ашылу салтанаты өтті.