24 наурыздан бастап ұрланған смартфондар бұғатталады

Бұл туралы Цифрлық даму, инновациялар және аэроғарыш өнеркәсібі министрлігінің өкілдері арнайы онлайн баспасөз мәслихатында айтты, деп Sкifnews.kz ақпарат порталы Sputnik.kz-ке сілтеме жасап хабарлайды.

Смартфондардың «ақ», «сұр» және «қара» тізімі пайда болады. Цифрлық даму министрлігінің жаңа бұйрығы тасымалдаушыларды смартфондардың IMEI кодтарын тексеруге міндеттейді. Бұл туралы министрлік өкілдерінің арнайы баспасөз мәслихатында айтылды.

«Ақ тізімдегі» смартфондар — заңды сатылған техника. Егер сатып алудың заңдылығына күмән туындаса, мысалы, IMEI коды қайталанса, құрылғы уақытша «сұр тізімге» енеді, смартфон иесіне мәселені 30 күн ішінде шешуге мүмкіндік беріледі.

Смартфонын «ақ тізімге» аудару үшін құрылғыны заңды сатып алғанын дәлелдеу керек.

Егер телефон жалған немесе ұрланған болса, ол «қара тізімге» енеді және абоненттің ұялы телефоны жұмыс істемейтін болады.

Қысқасы республикада смартфондарды тіркеу үшін арнайы портал іске қосылады.

Министрліктің айтуынша, жаңа ереже телефон бағасына әсер етпейді.

Мәжілістің жалпы отырысында сөз сөйлеген депутат Екатерина Смышляева мобильді байланыс құрылғыларының «сұр» айналымына қатысты шаралар қабылдауды талап етті.