Оқу-жазуды білмейтін әйелді туыстары үйсіз қалдырған

Павлодар облысында оқу мен жазуды білмейтін екі баласы бар әйел туыстарының қиянатына ұшырап, үйсіз қалған, деп хабарлайды Sкifnews.kz ақпарат порталы.

Павлодарлық әйелдің қиын жағдайы мектеп мұғалімдері тарапынан белгілі болған. Әйел туыстарының алдауымен ата-анасының үйінен айырылып, екі баласымен бірге далада қалған. Қазіргі уақытта ол Павлодардағы әйелдер мен балаларға арналған әлеуметтік-психологиялық оңалту орталығына орналастырылды.

«Әйел бір кездері азаматтық күйеуімен Ресейде тұрған, бірақ тұру мерзімі аяқталғаннан кейін елге оралуға мәжбүр болған. Өмірінде мектепте оқымағандықтан, оқу мен жазуды білмейді. Туыстары оны алдап, ата-анасының үйін өз атына рәсімдеп алған», — деп мәлімдеді Павлодар қаласының жұмыспен қамту және әлеуметтік бағдарламалар бөлімі.

Қазір әйел балаларымен бірге орталықта тұрып, қызметкерлер оған жұмыс табуға көмектесіп, балаларын мектепке орналастырған. Сонымен қатар, орталықтың заңгері мұрагерлік мәселесі бойынша жұмыс жүргізуде. Әйел Ресейде тұратын кіші ұлын қатты сағынады, бірақ әзірше оны алып кетуге мүмкіндігі жоқ.