Тұздалған қияр банкісі Түркістан облысынан әкелінген болуы мүмкін.
Мамандар өңірде мұндай оқиғаның соңғы 15 жылда кездеспегеннін айтады, деп жазады Skifnews.kz ақпарат порталы.
Қостанай облысында үш тұрғын үй жағдайында дайындалған тұздалған қиярды тұтынған соң ауруханаға түскен. Оларға ботулизм диагнозы қойылған. Зардап шеккендердің бірі қайтыс болғаны жайлы ақпарат бар.
Тұздалған қиярдан дәм татқандар Рудный қалалық ауруханасына жатқызылған. Лабораториялық зерттеу олардың ағзасында жүйке жүйесін зақымдайтын қауіпті у – ботулотоксин бар екенін растап отыр.
Қостанай облысы санитарлық-эпидемиологиялық бақылау департаменті басшысының орынбасары Зауре Елшібаеваның сөзінше, бұл оқиға соңғы 15 жылда өңірде алғаш рет тіркеліп отыр.
– Ботулизм дұрыс дайындалмаған және сақталмаған консервіленген өнімдерді қолданған кезде дамиды. Көбіне бұл – саңырауқұлақтар, бұршақ дақылдары, шпинат, сондай-ақ тұздалған және кептірілген балық пен ет өнімдері, – деді ол.
Мамандардың сөзінше, уланудың көзі – Түркістан облысынан әкелінген тұздалған қияр банкісі. Сондықтан да, Қостанай облысы тұрғындарында ботулизмнің таралу қаупі жоқ.