«Ұлттық бірегейлікке жасалған шабуыл»: Депутат радикал ағымдарды қатаң бақылауды ұсынды

Бас прокуроры Берік Асыловтың атына мемлекеттік рәміздерді қорлауға қатысты депутаттық сауал жолданды. Мәжіліс депутаты Ермұрат Бәпи қоғамда ұлттық құндылықтарға, салт-дәстүрлерге бағытталған арандатушылық әрекеттер күшейіп бара жатқанын айтты, деп хабарлайды Skifnews.kz ақпарат порталы.

Көк туға жасалған қорлық – қоғамды дүр сілкіндірді

Жуырда Атырауда өткен спорттық іс-шарада төрт әйелдің Қазақстанның мемлекеттік туын өзгертілген символикамен ұстап түскен суреті әлеуметтік желілерде кең тарады. Тудың бетіне арабша жазулар мен қылыш бейнесі салынған.

Бұл оқиға ел арасында үлкен резонанс тудырып, азаматтардың наразылығын өршітті. Депутаттар бұл әрекетті жай ғана әдепсіздік емес, ұлттық рәміздерге, мемлекеттілікке бағытталған қасақана арандатушылық деп бағалап отыр.

Ту – әрбір қазақстандық үшін қасиетті құндылық. Оны бөтен белгілермен бұрмалау – бүкіл халықты қорлау! Мұндай заң бұзушылыққа жол бермеу керек, – делінген депутаттық сауалда.

Бұл қылмысты кім ұйымдастырды?

Халық қалаулылары туды өзгерту әрекеті кездейсоқ жасалмағанын, оның арнайы дайындалғанын атап өтті. Ту сапалы баспа құралымен таңбаланған, бұл жағдайдың алдын ала жоспарланғанын көрсетеді. Сонымен қатар, қатысушы төрт әйелдің арандатушылардың құрбаны болуы мүмкін екені де айтылды.

Депутаттар бұл оқиғаның астарында ұйымдасқан топтың әрекеті жатқанын және шынайы кінәлілерді жауапқа тарту қажеттігін баса айтты.

Әкімшілік жазаға тартылған төрт әйелден бұрын, бұл арандатуды ұйымдастырғандар анықталуы керек! Бұл – ұлттық бірегейлікті жоюға бағытталған қауіпті қадам, – делінген мәлімдемеде.

Жалған тулар ашық сатылымда жүр

Тағы бір алаңдатарлық мәселе – бұрмаланған мемлекеттік рәміздердің онлайн сауда платформаларында еркін сатылып жатқаны. Wildberries Russ маркетплейсінде стандартқа сай келмейтін Қазақстан туы 5000 теңгеден саудалануда.

Мұндай әрекеттерге кім рұқсат берді? Бұл қалайша заңды болып отыр? – деп Бәпи наразылық білдірді.

Не істеу керек? Депутаттардың ұсыныстары:

- Құқық қорғау органдары бұл істі терең зерттеп, нақты ұйымдастырушыларды анықтап, жауапкершілікке тартуы тиіс.

- Мемлекеттік стандартқа сай келмейтін туларды сатылымнан алып тастап, мұндай әрекеттерге жол берген сауда орындары жауапқа тартылуы керек.

- Маркетплейстерге ұлттық бірегейлікке зиян келтіретін өнімдерді сатуға тыйым салатын заңнамалық өзгерістер енгізу қажет.

- Мемлекет радикалды ағымдардың өрескел әрекеттеріне бақылауды күшейтіп, діни құндылықтарды бұрмалауға қарсы шараларды қатаңдату қажет.

- Мектептерде дінтану сабақтарын ұлттық мәдениет негізінде жүргізу бағдарламасын әзірлеу қажет.

Жуырда өткен Ұлттық құрылтайда Президент Қасым-Жомарт Тоқаев қазақы дәстүрлер мен киім үлгілерін дәріптеуді ерекше атап өткен болатын. Бірақ депутаттардың айтуынша, қоғамда ұлттық мәдениетке қарсы әрекеттер жиілеп барады.

Бұл – біздің тарихымыз бен мәдениетімізді жоққа шығару әрекеті Ұлттық болмысымызды әлсіретіп, қоғамды екіге бөлуге тырысатын кез келген әрекетке тосқауыл қойылуы тиіс, – деп мәлімдеді депутат.