Елде есірткі саудасымен күрес қалай жүріп жатыр?

Жастарды желіктіріп, адамды еліктіріп, ақырында ауыр азаппен өлтіретін есірткіге қарсы күрес күшейсе де, ақшаға қызығып қауіпке баратын жастардың саны азаяр емес. Адамды ақылынан адастырып, адамдық қасиетін кетіретін есірткінің түр-түрін сататындар күн сайын ұсталады. Мәселен, тек бір ғана Алматыда өткен жылы есірткінің заңсыз айналымына қатысты 716 заңсыздық ашылған. Жастарды жарға жығатын қауіпті қылмысқа шетелдіктердің де қатысы бар болып шыққан, деп хабарлайды Skifnews агенттігі. 

Қалалық ПД ресми өкілі Салтанат Әзірбектің мәліметінше, 1 тонна 083 келі  есірткі тәркіленіп,  қылмыстық жауапкершілікке 322 адам тартылған, олардың ішінде 15-і шетел азаматтары.

«Бүгінгі күні жаһандық мәселелердің бірі синтетикалық препараттар. Ең өзектісі есірткіні өндіруге арналған зертханалар болып тұр. Арнайы мамандардың тексерулердің нәтижесінде 23 есірткі зертханасы жойылды. Сонымен қатар, синтетикалық препараттарды контактісіз әдістермен, электронды төлемдерді қолдану арқылы интернет арқылы тарату үрдісі өзекті мәселелердің бірі болып қала береді. Өткен жылмен салыстырғанда есірткімен ұсталғандардың  саны артып, биыл 105 есірткі сатушы ұсталды», - деді ПД ресми өкілі порталдың сұрағына берген жауабында. 

Алматы қалалық полиция департаментінің қызметкерлері бұл салада күресті қатал түрде жалғастыра бермеміз деп отыр. Жуырда ғана Алматы қаласында «мефедрон» психотроптық затының аналогтарын Астана, Қарағанды және Алматы қалаларында өткізу мақсатында аса ірі мөлшерде заңсыз өндіруді ұйымдастырған топты анықтады. 

«Сотқа дейінгі тергеп-тексеру нәтижесінде бүгінгі таңда психотроптық заттардың аналогтарын заңсыз өндірген 3 зертхана анықталды. Сондай-ақ, дәрілік заттарды таратумен және жарнамалаумен айналысатын 623 интернет-сайт анықталып, бұғаттау үшін CyberSupervision қызметіне жіберілді. Бұқаралық ақпарат құралдары арқылы халыққа толыққанды ақпарат жеткізу үшін қоғамдық орындарда 8 метро станциясындағы 42 мониторда әлеуметтік роликтер көрсетіліп жатыр. Анонимді сенім телефоны (WhatsApp 8-705-549-70-25) арқылы атақты спортшылар туралы ақпарат орналастырылған», - деді Салтанат Әзірбек. 

Әр обылстан бөлек, Ішкі істер министрлігі белсенді күрес жүргізіп келеді. Тек соңғы үш айда республика бойынша 69 есірткі зертханасын жойып,18 ұйымдасқан қылмыстық топтың жолын кескен. Бірақ әлемдік қары нарықта белең алып, сұранысқа ие болғандықтан, елімізде синтетикалық заттарды жасырын өндіру жағдайлары жиі кездеседі. 

Апиын жолында адасып, бір сәттік естен тана еліруге барын беретін адамдардың көптігі де қоғамды алаңдатып отыр. Заңсыз қаталдығы да жастардың арандап қалуын тоқтатар емес. Ауғанстаннан «Солтүстік бағыт» деп аталатын транзит арқылы тасымал, каннабис тобының есірткі заттарының айналымы, сондай-ақ «дәріхана» нашақорлығы өзекті проблемалар. 

«Жыл басынан бері 1425 адам ұсталды. Оның ішінде 76 әйел, 23 жасөспірім және 9 шетел азаматы. Есірткі қылмысын анықтау және жолын кесу бойынша жұмыс жалғаса береді», - деген еді ІІМ есірткі қылмысына қарсы іс-қимыл комитеті төрағасының орынбасары Данияр Мейірхан.

Ең қауіптісі, балаларды есірткі бизнесіне тарту жағдайлары көбейіп кеткен. Қорқынышты статистика: жоғары сыныптың әрбір бесінші оқушысы өмірінде синтетикалық есірткіні кем дегенде бір рет қолданып көрген. Жанды шошытатыны, нашақорлар арасында қыз балалардың да саны аз емес. 

Мамандар, героинді синтетикалық есірткілер алмастырғандықтан, олардың салдары өте қауіпті  болып тұр дейді.  Синтетикалық есірткіні қолдану ақыл-есі кемдікке, жүрек талмасына, инсультке әкеледі. Есірткінің әсерінен терезеден секіріп кету немесе мас күйінде көлік жүргізіп, жол апатына түсу секілді қайғылы жағдайларда жиілеген.