Қазақстанда соғыс ардагерлері мен тыл еңбеккерлерінің төлемі артты

Қазақстанда Ұлы Отан соғысы ардагерлері мен тылда еңбек еткен азаматтарға берілетін әлеуметтік төлемдердің көлемі көбейді, деп хабарлайды Skifnews.kz ақпараттық порталы.

Бұл туралы ОКҚ-да Еңбек және халықты әлеуметтік қорғау вице-министрі Олжас Анафин мәлімдеді. Оның айтуынша, ардагерлерге берілетін қолдау орталық және жергілікті деңгейде жүзеге асады. 2025 жылдың 1 қаңтарынан бастап зейнетақы төлемдері өсіп отыр: базалық зейнетақы 6,5%-ға, ал ынтымақты зейнетақы 8,5%-ға көбейді.

"Нәтижесінде биылғы 1 мамырдағы жағдай бойынша Ұлы Отан соғысы ардагерлеріне берілетін әлеуметтік төлемдердің жалпы көлемі 271 мың теңгені, ал тыл еңбеккерлерінікі 179 мың теңгені құрады", - деді Анафин брифингте.

Соңғы деректерге сәйкес, елімізде 105 ҰОС ардагері және соғыс жеңісіне үлес қосқан 40 мыңнан аса тыл еңбеккері тұрады.