Бұл кек емес, әділдік.
Сәкен Мамаштың бұрынғы әйелі Карина Госман өзін азаптағаны үшін шығарылған сот үкіміне пікір білдірді, деп хабарлайды Skifnews.kz ақпарат порталы.
Оның айтуынша, Мамаш соңына дейін кінәсін мойындамаған.
«Ол жылдар бойы да, сот процесі кезінде де манипуляция жасап, қысым көрсетті. Ол бәрін сезеді деп ойлаймын. Мен ескерткенімде күлген еді», — деді Карина үкім шыққаннан кейін.
Ол адвокаттарына, дағдарыс орталығына, журналистерге және қолдау көрсеткен қазақстандықтарға алғыс білдірді.
«Зорлық-зомбылыққа төзбеңіздер. Егер сүйсе, ұрмайды. Қашыңыз, айқайлаңыз, шығыңыз. Тығырықтан шығатын жол бар. Біздің елде мұндай дағдарыс орталықтары мен көмектескісі келетін адамдар барда әділдік орнайды. Ол үнсіздігімді үш пәтермен сатып алмақ болды. Бірақ мен оған: “ешқандай шаршы метрге үнсіз қалмаймын” дедім», — деді ол.
Карина Мамаштың алимент төлемейтінін, балалар тұра алатындай пәтер де қалдырмағанын айтты. Сондай-ақ, ажырасуды балалардың алдында әкесін төмендетпей, бейбіт шешкісі келгенін жеткізді.
«Бірақ ол тек өзін ойлады. 47 жасқа келіп те ақылы кірмеген адам үшін жауап бермеймін», — деді ол.