18 жастағы ресейлік ұсталды: Алматыда нөмір ауыстыруға пайдаланатын Sim-Box жабдығы тәркіленді

Алматыда байланыс жүйесін заңсыз пайдаланған күдікті ұсталды. 18 жастағы Ресей азаматының пәтерін тінту кезінде құқық қорғаушылар шынайы қылмыстық “арсеналды” анықтады: қазақстандық операторлардың 300-ден астам SIM-картасы, нөмірлерді жаппай ауыстыруға арналған SIM-Box құрылғысы және қосымша техникалық жабдықтар, деп хабарлайды Skifnews.kz ақпарат порталы.

Қалалық прокуратура мәліметінше, бұл дерек бойынша ҚР ҚК-нің 213-бабы (“Байланыс құралдары мен желілеріне заңсыз қол жеткізу”) бойынша қылмыстық іс қозғалды. Бұл бап бойынша 5 жылға дейін бас бостандығынан айыру жазасы қарастырылған.

Биылдың өзінде Алматы прокуратурасы осындай 7 істі сотқа жолдаған, оның төртеуі бойынша үкім шығарылған.

Мамандардың айтуынша, SIM-Box арқылы заңсыз әрекеттердің ауқымы орасан: ол интернет-алаяқтықтан бастап, байланыс операторларына миллиондаған шығын келтіруге дейін барады. Бұл ұсталу – тек бір қылмыстық тізбектің көрінген бөлігі болуы мүмкін.