Сот орындаушылары халықтың 26 млн теңгесін казиноға салған

Астанада екі жеке сот орындаушысы тұрғындардан өндірілген ақшаны мемлекет қазынасына аударудың орнына, өздерінің жеке қызығушылықтарына жұмсағаны әшкереленді, деп хабарлайды Skifnews.kz ақпарат порталы.

Ресми деректерге сәйкес, олар 2 жыл бойы әкімшілік айыппұлдардан түскен қаржыны жымқырып келген. Мемлекетке түсуі тиіс 26 миллион теңге құмар ойындарға жұмсалған. Тіпті жеке және заңды тұлғалардан түскен қаражат та талан-таражға түскені анықталды.

Сот орындаушыларының басты міндеті – сот шешімдерінің орындалуын қамтамасыз ету. Алайда олар керісінше азаматтардың ақшасын өз құмарлықтарына пайдаланған. Бұл әрекет қоғамда үлкен резонанс тудырып отыр, себебі заңды қорғауы тиіс мамандар заңды өздері бұзған.

Құзырлы органдардың хабарлауынша, сотқа дейінгі тергеу басталғаннан кейін күдіктілер келтірілген шығынды толық өтеген. Соған қарамастан, уәкілетті орган екі сот орындаушысын лицензияларынан айыруға шешім қабылдап отыр.

Қазір бұл дерек бойынша барлық материалдар тексерілуде. Сарапшылардың пікірінше, мұндай оқиғалар сот орындаушылар институтына деген сенімге нұқсан келтіреді.