Мұхтар Мағауиннің қабіріне туған жердің топырағы мен жусаны қойылды (ВИДЕО)

АҚШ-тың Вашингтон қаласында жерленген қазақ әдебиетінің алыбы Мұхтар Мағауиннің қабіріне туған елдің топырағы мен жусаны жеткізілді, деп хабарлайды Skifnews.kz ақпарат порталы.

Бұл туралы Сапарбек Нағашыбеков әлеуметік желідегі парақшасында хабарлады.

— Бүгін Вашингтонға жақын жерде, қазақтың ұлы жазушысы, абызы Мұхтар Мағауиннің қабірін зират етіп, қазақтың «топырақ апару» дәстүрі жасалып, атамызға құран бағышталды. Қабыл болсын. Мұхтар атамыздың ұлы Едіге ағамыз Қазақстандағы ата бабасы жерленген жерден алып келген топырақ пен жусанды атамыздың қабіріне көмді. Бұл шараға қазақтар мен біздің Вашингтондағы Kazakh American Association қатысты, дейді ол.

Нағашыбековтің сөзінше, бірнеше ай бұрын Мағауиннің АҚШ-тағы қабірінен топырақ алынып Қазақтандағы ата-бабаларының қасына жеткізілген.

 – Мұхтар Мағауин атамыз бүкіл өмірін қазаққа арнап 27 том кітаптар жазып, қазақтың тарихын түгендеп берді , болашақ ұрпақ үшін. Қазақтың тарихында осыншама кітап жазған жазушы болмаған. Уа Алла сен рахмансың, рахимсың, ғафурсың, кешіргенді жақсы көресің Мұхтар атамыздың күнәләрін кешіріп жанын жаннатық қылғай. Зираттан кейін Едіге ағамыздың үйіне барып атамызды еске алдық, құран оқылды. Үйінде атамыздың кабинеті, кітапханасы әлі сол күйінде сақталған, делінген жазбада.