Қостанайда вагон рельстен шығып, контейнер құлады: ҚТЖ апатты жасырып отыр

Қостанайдан тараған видео елді дүр сілкіндірді. 14 қыркүйекте пойыз вагоны рельстен шығып, ауыр контейнер жолдың үстіне құлаған. Бірақ ең сорақысы – бұл апат ресми есепке енбеген. Полиция департаменті «мұндай оқиға тіркелмеген» деп отыр, деп хабарлайды Skifnews.kz ақпарат порталы. 

Әлеуметтік желіде қызу талқы жүріп жатыр. Бір қызметкер: «Бұндайды жасырып қалу мүмкін емес, өзім ЖД-де істеймін» десе, тағы бірі: «Келісім-шартты вагон мен жолға емес, тек локомотивке жасаған соң осындай болады» деп ашық сын айтты. Ал үшіншісі: «Астанадағы бастықтарға бәрібір, ақша сөйлейді. ҚТЖ-да былық бұрыннан бар» деп шүйлікті.

Куәгерлердің сөзіне сенсек, мұндай апат болған сәтте теміржолдың әрбір бөлімшесі дереу хабардар болуы тиіс. Бірақ тіркелмеген апат – халық арасында «ҚТЖ әдейі жасырып отыр» деген күдік туғызды.

Қостанай жұрты биліктен ашықтық талап етуде. «Жол мен вагонды жөндеудің орнына тек есеп үшін келісім-шарттар жасалып жүр ме?» деген ауыр сұрақ күн тәртібіне шықты.