Естімеген елде көп: Түркістанда полицей қызметтік көлікпен ағаш тасыған

Түркістан облысында полиция қызметкері қызметтік көлікті жеке мақсатта пайдаланғаны жөнінде бейнежазба тарады. Видеода полицей нөмірі анық көрінетін арнайы автокөлікпен ағаш тасып жүргені байқалады. Кадрлар әлеуметтік желіде қызу талқыланып, жұрт екіге жарылды: бірі — «бұл жемқорлықтың белгісі» десе, енді бірі — «мүмкін, қызметтік тапсырма шығар» деп қорғауда, деп хабарлайды Skifnews.kz ақпарат порталы.

Тұрғындар арасында «қоғамдық сенімге нұқсан келтіретін әрекет» деп бағалағандар көп. Кейбіреулер мұны қызмет бабын асыра пайдалану, тіпті жеке пайдасына жұмыс көлігін жұмсау деп қабылдаған.

Облыстық полиция департаменті әзірге бұл оқиғаға қатысты ресми түсініктеме берген жоқ. Алайда бейнежазба қоғамда ішкі істер органдарының беделіне және қызметтік тәртіптің сақталуына қатысты сұрақтарды қайта көтерді.

Мамандардың айтуынша, мұндай жағдайлар тек жеке қызметкердің емес, бүкіл құрылымның абыройына әсер етеді. Егер факт расталса, бұл полиция қызметкерлерінің этикалық кодексін бұзу және қызметтік көлікті мақсатсыз пайдалану ретінде бағалануы мүмкін.