Жаңа ғана Серікпен сөйлестім.
«Жеңіс» дзюдо клубының директоры Айдар Махметов Қарағанды облыстық дене шынықтыру және спорт басқармасының басшысы Серік Сәпиевке қатысты тараған ақпаратқа түсініктеме берді, деп хабарлайды Sn.kz ақпарат порталы.
Оның айтуынша, Сәпиев пен орынбасары арасындағы кикілжің жұмыс мәселесіне байланысты туындаған, ал физикалық күш қолдану туралы ақпарат шындыққа жанаспайды.
Айдар Махметов Серік Сәпиевпен сөйлескенін айтып, жағдайдың толықтай реттелгенін мәлімдеді.
«Жаңа ғана Серікпен сөйлестім. Оның орынбасары Есімхановпен арадағы келіспеушілік тек қызметтік мәселелерге, нақтырақ айтқанда, қажетті құжаттарды ұсынудан бас тартуға байланысты туындаған.
Физикалық күш қолданылғаны туралы ақпарат шындыққа жанаспайды. Ешкім ешкімді ұрған жоқ. Бұқаралық ақпарат құралдары өкілдерінен мұндай қауесет таратпауды сұраймын.
Қазіргі уақытта жағдай толықтай реттелді, тараптар өзара түсіністікке келді, жанжал түбегейлі шешілді», – деді ол.
Бұған дейін бірқатар ақпарат көздерінде Қарағанды облыстық дене шынықтыру және спорт басқармасының басшысы Серік Сәпиевтің соққыға жығылғаны туралы мәлімет тараған болатын. Алдын ала деректерде оған өз орынбасары, самбодан әлем және Азия чемпионы Дәурен Есімханов қол көтерді деген ақпарат айтылды.