Аяғы ауыр келіншекті қаққан салық қызметкері 30 тәулікке қамалды

Алматыда жүкті әйел мен оның баласын қағып кеткен салықшы 7 жылға көлік жүргізу құқығынан айрылды, деп хабарлайды «Қазақпарат» қалалық соттың баспасөз хатшысы Қуандық Ешіметке сілтеме жасай отырып.

— Алматы облысы Ұйғыр ауданы Салық басқармасының басшысы Бақыт Құрмашев Әкімшілік соттың қаулысымен ҚР ӘҚК бірнеше бабы бойынша ҚР ӘҚБтК-нің 467-бабының 3-бөлігінде, 468-1-бабының, 469-бабының 2-бөлігінде көзделген әкімшілік құқық бұзушылықты жасағаны үшін кінәлі деп танылды. Оған жаза ретінде 30 тәулікке қамалып, 7 жыл мерзімге автокөлік құралын жүргізу құқығынан айыру белгіленді, — деді Қуандық Ешімет.

Еске сала кетсек, оқыс оқиға маусымның 23-інде Жансүгіров-Жұмабаев көшелерінің қиылысында орын алған болатын. Мемлекеттік нөмірі В 059 RAN маркалы «Лексус» автокөлігін мас күйінде тізгіндеген салықшы қиылыстан өтіп келе жатқан аяғы ауыр келіншек Малика Чайбырова мен оның 4 жасар ұлын қағып кеткен. Оқиға орнынан бой тасаламақ болған шенеунікті куәгерлер ұстап қалған еді.