Атамекен суға батып жатыр: 10 жыл уәде - нәтиже жоқ, халық өз күнін өзі көріп отыр

Маңғыстау облысындағы Атамекен ауылында тұрғындар тағы да су мәселесімен бетпе-бет келді. Жер асты сулары үйлер мен аулаларды басып, адамдарды күн сайын қауіппен өмір сүруге мәжбүрлеп отыр.

Жергілікті халықтың айтуынша, кей үйлерде су тізеден келеді, тіпті электр қуатын өшіруге тура келеді. Дренаж жүйесі бұрын болған, бірақ жер жекешелендірілгеннен кейін ол жойылған.

Содан бері тұрғындар он жылдан астам уақыт бойы уәдені ғана естіп келеді. 2026 жылы құны шамамен 40 млн теңге болатын жаңа жоба жасалғанымен, нақты құрылыс мерзімі әлі белгісіз.

Аудан әкімінің орынбасары қаржыландыру мен жұмыс басталатын уақыттың нақтыланбағанын айтқан. Ал бұл уақытта халық әр жаңбырдан кейін құм сатып алып, үйлерін өз күшімен қорғауға мәжбүр.

Тұрғындардың шағымы көбейгенімен, мәселе шешілер емес, жауапты органдар нақты әрекетке көшпей отыр. Атамекендегі жағдай - уәде көп, нәтиже жоқ жүйенің тағы бір көрінісі.