Тергеу барысы ерекше бақылауға алынған.
Ақтөбедегі жанармай құю бекеттерінің бірінде болған жантүршігерлік жарылыс салдарынан үш адам көз жұмды. Қайтыс болғандардың екеуі – балалар, деп хабарлайды Sn.kz ақпарат порталы.
Ақтөбе облыстық полиция департаментінің мәліметінше, оқиға жанармай бекетінде тұрған Honda маркалы автокөліктің өртенуінен басталған.
«Оқиға салдарынан үш адам, оның ішінде екі бала қаза тапты. Тағы бір адам ауыр күйік алып, ауруханаға жеткізілді. Аталған факті бойынша сотқа дейінгі тергеу басталды», – деп хабарлады полиция өкілдері.
Қазіргі уақытта құқық қорғау органдары қайғылы жағдайдың барлық мән-жайын анықтап жатыр.
Сондай-ақ полиция жанармай бекетінің иесінің ұсталғанын мәлімдеді. Ол уақытша ұстау изоляторына қамалды. Тергеу барысы ерекше бақылауға алынған.