181 жолаушы болған: Қырғызстанда ұшақтың бір қанаты сынып кетті

Қырғызстанда Tez Jet әуе компаниясының ұшағы ұшуға әрекеттенген сәтте артқы шассиінің бірі сынып, салдарынан әуе кемесі қисайып, сол жақ қанатына тіреліп қалған, деп хабарлайды  Sn.kz ақпарат порталы.

«Қырғызстан әуежайлары» ААҚ мәліметінше, ұшақ ауаға көтеріліп үлгермеген. Екпін алу кезінде ұшқыштар әуе кемесін дер кезінде тоқтатқан.

Бортта 181 жолаушы болған.

Оқиға салдарынан авиациялық керосин төгілді. Қазіргі уақытта оқиға орнында өрт сөндіру қызметі мен әуежай мамандары жұмыс істеп жатыр.

Төтенше жағдайға байланысты барлық рейс уақытша тоқтатылды. Әуежай әкімшілігі ұшақтарды қабылдау мен жөнелту тек жанармай төгілуінің салдарын жойып, зақымдалған әуе кемесін эвакуациялағаннан кейін ғана мүмкін болатынын түсіндірді.

Оқиға орнында әуежай басшылығы жүр. Қазіргі уақытта болған жағдайдың себептерін анықтайтын арнайы комиссия құру мәселесі қарастырылуда.