Қазақстан жыл сайын ішкі сұраныстан артық картоп өндіргенімен, көктемнің соңы мен жаздың басында импортқа қайта жүгінеді.
ҚР Ауыл шаруашылығы вице-министрі Назгүл Хатепова Үкімет отырысынан кейінгі брифингте елдің картопқа жылдық қажеттілігі 2 млн тоннадан асатынын, ал былтыр 2,8 млн тонна өнім жиналғанын айтты. Биыл да министрлік шамамен осы көлемді күтеді, ал картоп алқабы ұйымдасқан шаруашылықтарда тағы 5,5 мың гектарға ұлғайтылған, деп хабарлайды Sn.kz ақпарат порталы.
Вице-министрдің сөзінше, республикада жалпы сыйымдылығы 2,6 млн тонна болатын 956 көкөніс қоймасы бар және өндірілген өнімді сақтауға мүмкіндік жеткілікті. Соған қарамастан мамыр-маусым айларында ішкі қор азайып, жаңа өнім шыққанға дейін Қазақстанға сырттан картоп әкелінеді. Яғни өнім көлемі де, сақтау қуаты да жеткілікті деген есеп болғанымен, маусымаралық кезеңдегі импорт мәселесі әлі шешілген жоқ. Енді министрлік үшін негізгі сұрақ мол өнімді жинау ғана емес, оны келесі өнімге дейін ішкі нарыққа тұрақты жеткізетін жүйені жолға қою.