«Жұлдызды жол» актері Патрик Стюарт 86 жасында қайтыс болды

Британдық актер Патрик Стюарт Лос-Анджелестегі үйінде 86 жасында қайтыс болды. Ол 28 қазанда өмірден өткен. Бұл туралы дүниежүзілік БАҚ актердің отбасы жариялаған мәлімдемеге сілтеме жасап хабарлады, деп жазады Sn.kz ақпарат порталы.

Актер «Star Trek: The Next Generation» сериалындағы капитан Жан-Люк Пикар және «X-Men» фильмдеріндегі профессор Чарльз Ксавье рөлдері арқылы кеңінен танылған. Ол Альцгеймер ауруы мен Леви денешіктері деменциясымен қысқа уақыт күрескеннен кейін көз жұмған.

Патрик Стюарттың өмірі мен шығармашылық жолы

1940 жылы Англияның Батыс Йоркшир графтығында дүниеге келген Патрик Стюарт актерлік мансабын 19 жасында бастаған. 1966 жылы беделді Корольдік Шекспир труппасына (Royal Shakespeare Company) қабылданды. Ал 2010 жылы Ұлыбритания патшайымы Елизавета II оған рыцарь атағын берді.

KNA агенттігінің мәліметінше, Патрик Стюарт қоғамдық мәселелерге де белсенді араласып, тұрмыстық зорлық-зомбылық және соғыс ардагерлерінің психологиялық денсаулығы секілді проблемаларға қоғам назарын аударған. Сонымен қатар босқындарды қорғап, жануарлар құқығын қолдаған.

«Star Trek» сериалында капитан Джеймс Кирк рөлін сомдаған канадалық актер әрі жазушы Уильям Шетнер Патрик Стюарттың қазасына байланысты X әлеуметтік желісіндегі парақшасында көңіл айту жазбасын жариялады.

«Мұның бәрі жанға қатты батты. Сэр Патрик Стюарт менің досым, әріптесім әрі керемет актер болды. Театр сахнасынан бастап Enterprise кемесінің капитан көпіріне дейін ол әр ісіне зерде, талғампаздық және терең адамгершілік сезімін дарытты. Капитан Пикар бойымыздағы ең жақсы қасиеттерді бейнеледі. Оны сомдаған адамның өзі де сондай еді. Мен оны және шығармашылығын шексіз жақсы көріп, құрметтедім», – деп жазды Уильям Шетнер.