27 қараша күні кешкісін Алматыда алты автокөлікке зақым келтірген ірі жол-көлік оқиғасы болды, деп хабарлайды СТВ телеранасы.
Lexus және Nissan көліктері Шығыс айналма автокөлік жолымен (ШААЖ) шығыс бағытта қатты жылдамдықпен келе жатқан. Белгісіз себептермен Lexus көлігі Nissan-ды соққан. Қатты соққыдан Nissan оң жаққа қарай ұшып кетеді, ал Lexus сол жақтағы қоршауға ұрынды. Алматыдағы жол-көлік оқиғасы кезінде қоршаудың сынықтары мен оған соғылған көліктің бөлшектері қарама-қарсы бағытқа ұшқан. Сол кезде батыс бағытта Kia, Lada, Audi және Nissan Sunny автокөліктері келе жатты.
Қарама-қарсы бағытта келе жатқан көліктердің алдыңғы әйнектері мен дөңгелектеріне зақым келді. Audi жүргізушісінің айтуынша, Lexus-те жүргізуші мен оның жолаушысы болды. Оқиғадан кейін олар жарақат алғанына қарамастан, бұл жерден қашып кеткен.
Зардап шеккендердің бәріне алғашқы медициналық көмек көрсетілді. Nissan жүргізушісі ауруханаға жатқызылды. Полицейлер жол-көлік оқиғасы орнынан ізін жасырғандарды іздестіріп жатыр.