Еліміздің кей аймақтарында күн қайта суытады

Мамандардың айтуынша, салқын атмосфералық фронттар Қазақстанға Батыс Сібірден келген. Соның салдарынан республиканың басым аумағында жаңбыр жауып, ауа температурасы төмендейді.

Солтүстік облыстарда түнде -3 градустық аяздар орнап, жаңбыр соңы сулы қарға ұласуы мүмкін. Суық арктикалық фронттардың жүруіне байланысты 17-18 мамыр күндері еліміздің оңтүстік және оңтүстік-шығыс өңірлерінде нөсерлі жауын жауады.

Астанада 16 мамыр күні өтпелі жаңбыр жауып, күн бұлтты болады. Түнде жылдамдығы секундына 15-20 метрге дейін жел соғады деп күтілуде. Түнде ауа температурасы +4+6 градус, күндіз +15+17 градус жылы. 17 мамырда да елордада күн бұлтты, бірақ жауын-шашынсыз.

16-18 мамыр аралығында Алматыда күн бұлтты, жаңбыр жауады. 16-17 мамыр күндері найзағай ойнап, жел күшейеді. Түнде ауа температурасы +12+14, күндіз +30+32 градус жылылықты көрсетеді.