$ 447.4 € 477.55 ₽ 4.76
Қазақстан мен Қырғызстан 2015 жылғы 8 мамырда шекарадағы кедендік бақылауды алып тастайды. Бұл туралы Қырғыз Республикасы үкіметінің баспасөз қызметіне сілтеме жасап, ҚырТАГ хабарлады.
«26 желтоқсанда Қырғыз Республикасының премьер-министрі Джоомарт Оторбаев Қырғыз Республикасының Еуразиялық экономикалық одаққа қосылуы туралы шарттың рәсімдерін іске асыру жөніндегі іс-қимыл жоспарын дайындау бойынша министрліктер мен ведомстволар басшыларымен жиын өткізді», – деп хабарлады ведомство.
Мәжіліс барысында Қырғыз Республикасының ЕАЭО-ға қосылу туралы шарт 2015 жылғы 1 мамырдан бастап күшіне енетіні атап өтілді және ол Қырғыз Республикасының негізгі міндеттемелерін көздейді. Қырғызстан 2015 жылғы наурызға дейін Шартты бекіту бойынша мемлекетішілік рәсімдерді жүргізуі тиіс.
Бұдан басқа, келесі жылдың 8 мамырында қырғыз-қазақ шекарасындағы кедендік бақылау алынып тасталады. Соған дейін Қырғызстан «Манас» және Ош әуежайларында, Торугарт пен Иркештамда өткізу пункттерін салуы тиіс. Сондай-ақ санитарлық, фитосанитарлық, ветеринарлық бақылау саласындағы қажетті шаралар мен тиісті карантиндік іс-шараларды жүргізуі қажет.
Сондай-ақ жиынға қатысушылар Қызғыз Республикасы мемлекеттік органдарының Кеден одағына, Бірыңғай экономикалық кеңістік, Еуразиялық экономикалық одаққа мүше мемлекеттермен кедендік бақылаудағы тауарларға қатысты ақпараттық алмасу бойынша шараларды талқылады.
Жиын қорытындысы бойынша, премьер-министр Қырғыз Республикасы министрліктері мен ведомстволарына Қырғызстанның ЕАЭО-ға қосылуы бойынша бірінші кезектегі шараларын іске асырудың күнтізбелік жоспарын жедел түрде пысықтап, нақтылауды тапсырды.
