Шымкенттік полицейлер алаяқтықпен айналысқан банкирді іздестіріп жатыр

Шымкентте алаяқтық қылмысына қатысы бар деген күдікке ірі банктің филиалын басқарып келген 45 жастағы Нұржан Көлбаев ілінді. Оған қазір полицейлер іздеу жариялаған.

«Тергеу барысында 45-жастағы күдікті қаладағы банктердің бірінің филиал төрағасы лауазымында болып, салымшылардың ақшаларын алаяқтық жолмен иемденіп, белгісіз бағытқа бой тасалағаны анықталды. Аталған жайт негізінде ҚР ҚК-нің 190 бабы, 4 бөлімі «Алаяқтық» бойынша сотқа дейінгі тергеу жұмыстары жүргізілуде», - делінген ОҚО ІІД-нің баспасөз қызметі таратқан хабарламада.

Қазіргі таңда полицейлер Көлбаев Нұржанның болуы мүмкін мекен-жайын анықтау мақсатында барлық жедел-іздестіру іс-шараларын жүргізуде. Іздестіруде жүрген тұлғаны тауып, оны ұстау үшін ОҚО ІІД КПБ және Шымкент ҚІІБ Әл-Фараби ПБ-нің барлық жеке құрамы жұмылдырылған.

Күдіктінің белгілері: бойы 170 см, орта бойлы, шашы қара, көзі қара. Ерекше белгілері жоқ.