Түркістан облысында жасөспірімдер жанжалдасып, біреуі оққа ұшты

Мақтаарал ауданының елді мекендерінің бірінде 7 шілде күні кешкісін жасөспірім оқ жарақатынан қаза тапты. Бастапқы мәлімет бойынша, бозбалалар арасында ақша үшін жанжал туындаған деп жазады Оtyrar.kz

Полиция хаттамасында «бұзақылық мақсатта» кісі өлтірді деп жазылғанымен, тергеушілер оқиғаның себептерін анықтауы тиіс. Расталмаған деректер бойынша, екі жасөспірім ақша үшін араздасқан. Бірі екіншісіне бауырының алған қарызын қайтарығысы келмеген көрінеді.

Полиция хабарлағандай, бозбалалар арасындағы жанжал салдарынан бірі шолақ мылтықпен екіншісін аяғынан атқан. Зардап шегуші күре тамырынан жарақат алып, дәрігерлер тез келіп жеткеніне қарамастан, оны құтқару мүмкін болмады. Жасөспірім көп қан жоғалтып, сол күні ауруханада жан тапсырды.

Қазір Мақтаарал АІІБ «Кісі өлтіру» бабы бойынша сотқа дейінгі тергеу амалдарын бастап кетті. Сот шешімімен күдікті екі айға қамауға алынған.