Тамыздың 13-і күні Алматыдағы Туризм жəне спорт академиясының алдында ондаған ата-ана жиналды. Олар балаларының спорттағы жетістіктеріне қарамастан грантқа ілінбей қалғандарына наразы деп хабарлайды Азаттық.
«Менің балам осы академияға тапсырған, 113 балл жинаған. Соның өзінде түспей қалды. Ол 3-сыныптан бастап еркін күреспен айналысады, 7-сыныпта республикалық спорт колледжіне оқуға түсті. Соны аяқтап академияға келіп едік, түспей қалды. Естуімізше, спортта еш жетістіктері жоқтардың өзі оқуға түскен. Обал ғой балаға» , - дейді наразы ата-аналардың бірі Гүлнар Мұратбекова.
Алматы облысынан келген талапкер Үкілай Ахмет бес жылдан бері джиу-джитсумен айналысады.
«Төрт рет Қазақстан чемпионы болдым және Азия чемпионы атандым. ҰБТ-дан екі пән бойынша 34 балл алдым және шығармашылық емтиханнан - 80 балл, сонда барлығы 114 балл болып тұр. Ал кей талапкерлер грантқа 115 баллмен түсіпті»,- дейді Үкілай.
Ата-аналар академиядағы ақылы оқудың 500 мың теңге екенін айтады. Жоғарғы оқу орны басшылығы оның жыл сайын өзгеруі мүмкін екенін де ескерткен.
Жиналғандар алдына шыққан Туризм жəне спорт академиясының проректоры Мұхтар Есқалиев осындай наразылық боларын сезгендерін айтады.
«Биылғы жылға дейін жоғарғы дәрежедегі спортшыларымыз, соңғы үш жылдағы халықаралық және республикалық жарыстардың жеңімпаздары мен жүлдегерлері басымдыққа ие болатын. Негізгі конкурс осылардың арасында болатын да, спортқа қатысы бар жасөспірімдер оқуға түсетін. Биыл сол заңға өзгеріс енді де, жетістік тек балы тең болған жағдайда да ғана басым түсетін болды. 2018 жылдың шілде айында Білім туралы заңының 26-бабы 5-тармағына тиісті өзгеріс енді. Яғни, енді жалпы білім беретін мектептердің түлектері, кім жоғарғы балл жинаса сол оқуға түсіп тұр», - дейді Мұхтар Есқалиев.
Проректордың сөзінше, биыл республикадағы спортшыларды 42 жоғарғы оқу орны дайындайды. Солардың барлығына 450 грант бөлінген.