Денесін орақпен тіліп тастаған: Жамбыл облысында айуандықпен өлтірілген ер адамның туыстары тергеу жұмысына наразы

Дәурен Құралбаев асқан айуандықпен өлтірілген. Оның денесі онға жуық жерден орақпен орылып, пышақпен тілініпті. Сөйтіп қаскөйлер марқұмды қансыраған күйде дәріхана маңына тастап кеткен.

«Өте терең орақпен орып тастаған. Орақпен басын, құлағын, мойнын, жамбасын кескілеп тастаған. Тереңдігі 20 см. Екі литр қан құйды. Оны ағзасы қабылдамады», Д.Құралбаевтың жары Райхан Жолдыбаева.

Дәурен сол алған жарақатынан жансақтау бөлімінде жатып жан тапсырды. Жарының айтуынша, ол таныстарының қолынан қаза тапқан. Оны достарымен үйге алдап шақырып, қақпанға түсірген дейді. Дастархан басында жанжал туындап қарудан оқ атылған. Сол сәтте марқұмның серіктері сытылып кетіп, өзі ұсталып қалыпты. Ал айуандықты бір топ жігіт жасағанымен әзірге біреуі ғана қамауда.

«Бір-ақ бала жатыр. Басында Нұрсұлтан деген бала отырған. Кейін інісін әкеп жатқызды. Бір-ақ бала жатыр қазір. Қалған 7-8 бала жан-жақта қашып жүр. Ал полицейлер сол балалардың сөзін сөйлеп, соларды жақтап отыр», - Д.Құралбаевтың анасы Сәрсенкүл Қамшыбаева

Қара жамылған отбасы марқұмды полицейлер мазақ қылды дейді. Яғни оның қансыраған күйін суретке түсіріп, әлеуметтік желіге жүктеген. Алайда тәртіп сақшылары мұны жоққа шығаруда. Әрі тергеу ісі әділетті дейді.

«1997 жылы туылған күдіктіге қатысты ҚР ҚК-ның 106-бабы 1-бөлімі (Денсаулыққа қасақана ауыр зиян келтіру) мен 293 –бабы 3-бөлімі 2-тармағымен (Бұзақылық) қылмыстық іс қозғалып, тиісті сот-медициналық сараптамасы тағайындалды», - Жамбыл облыстық ІІД баспасөз хатшысы Гүлсара Мұхтарқұлова.

Тек жалғыз күдіктінің қамалғанына наразылық танытқандар кінәлілерді жаппай жазаға тартқызу үшін ішкі істер министрлігіне арыз жазбақ. Ал марқұмның артында жары мен үш баласы қалды.

Дереккөз: КТК телеарнасы