125 баллы бар талапкер грантқа түсе алмай қалды

Шенеуніктер мемлекеттік грант ең алдымен «Алтын белгі» иегерлері, халықаралық байқаулардың жеңімпаздарына беріледі деп уәде еткен еді. Алайда олардың қатарында Грузияда өткен математика пәні бойынша халықаралық сайысқа қатысып, елге жүлдемен оралған Жұлдыз Оспан мен Арай Нұржанова жоқ. Түлектерге ҰБТ-ға қатыспастан қолдарына бірден «125 балл» деген сертификат беріліпті. Яғни, олар ешқандай байқаусыз мемлекеттік білім грантына ие болуы керек. Ашынған ата-аналар берген уәдесінде тұрмаған Білім министрлігінен кеткен қателікті дереу түзеуін талап етіп, Аслан Сәрінжіповке хат жолдады.

«Қызым әлі білмейді. Техникалық ақауларға байланысты сені қоспаған шығар деп оған айтпай отырмыз. Қызыма қазір шынымды айтсам, ауыр болады», – дейді Жұлдыз Оспанның әкесі Қайсар Оспанов.

Астанадағы білім гранты төңірегіндегі дау мұнымен шектелмейді. Оңтүстік Кореяда ғылыми жоба қорғағаны үшін 100 баллдық сертификат алған Арай да «мемлекет есебінен тегін оқуға түсе алмадым» деп отыр.

«Білім грантына ие болғандардың тізімде жоқ екенімді көріп, таңқалдым. Еуразиялық университетке тапсырған бір түлек 89 баллмен грантқа өткен, ал мен 100 балмен қабылданған жоқпын. Бүгін, 11 тамызда Білім министрлігінің жанындағы байқауға жауапты комиссияға бардық, мардымды жауап ала алмадым», – дейді Арай Нұржанова.

Білім министрілгіндегі шенділер «мәселені шешеміз» деп қысқа қайырған. Жауаптылар мән-жайды анықтап жатыр екен. Алайда халықаралық олимпиаданың жеңімпаздары Жұлдыз Оспан мен Арай Нұржанованың ата-анасы мына жағдайдан кейін жайбарақат жүре алмаймыз деп отыр. Бірі Аслан Сәрінжіповке жеке хат жазып, министрілкке әкеп тастап кетсе, енді бірі министрдің жеке қабылдауына жазылып қойыпты.

Еске сала кетсек, жалпы, еліміз бойынша мемлекеттік білім грантына ие болғандардың тізімі 11 тамызда шықты. Биыл бюджеттің есебінен 32 мыңнан астам адам тегін оқи алады. Ал грантының басым бөлігі, яғни 78 пайызы қазақ тілді түлектерге бұйырмақ. 32 мың гранттың 12 мыңы техникалық, 6 мыңы педагогикалық, 2 жарым мыңы ауыл шаруашылығы мамандықтарына арналған. Бұл гранттар еліміздегі 60 университетке тиесілі.