$ 449.58  486.94  4.86

Назарбаев Армения Премьер-Министрі Никол Пашинянмен кездесті

Кездесуде тараптар екі жақты ықпалдастық және сауда-экономикалық қатынастарды одан әрі дамыту мәселелерін талқылады деп хабарлайды Ақорданың баспасөз қызметі.

Нұрсұлтан Назарбаев Қазақстан мен Армения арасындағы ынтымақтастықтың жоғары деңгейде ілгерілеп келе жатқанына тоқталып, оны кеңейтудің әлеуеті жеткілікті екенін атап өтті.

– Қазақстан Армениямен әрдайым жақсы қарым-қатынаста болды. Елдеріміз арасындағы сауда айналымы былтыр 60 пайызға жуық өсті. Бұл үрдіс қазір де жалғасын тауып отыр. Мұнымен шектелмейтінімізді атап өткім келеді. Үкіметтеріміз екі жақты байланыстарды нығайту үшін күш жұмылдыруы керек. Біздің компанияларымыз екі елдің де экономикасына инвестиция құя алады, – деді Қазақстан Президенті.

Мемлекет басшысы еңбек миграциясы мәселелеріне және екі ел кәсіпкерлері арасындағы байланыстарды кеңейту қажеттігіне тоқталып, ол үшін тиімді жағдай жасалғанын атап өтті.

Н.Пашинян Нұрсұлтан Назарбаевқа кездесуге және мемлекетаралық байланыстарды одан әрі нығайту ісіндегі маңызды мәселелерді талқылауға мүмкіндік туғызғаны үшін ризашылық білдірді.

– Өзара ықпалдастығымыз оң қарқын алып отырғанымен ерекшеленеді. Оның одан әрі осылай ілгерілей беретініне сенімдімін. Біз үшін Қазақстанмен арадағы байланыс өте маңызды. Экономика секторындағы қатынастарды, соның ішінде инвестициялық ынтымақтастықты дамыта түсеміз деп үміттенеміз, – деді Армения Премьер-Министрі.

Сонымен қатар, Н.Пашинян Қазақстан мен Армения арасындағы ынтымақтастықты халықаралық ұйымдар аясында нығайтудың маңызды екенін атап өтті.

Сіздің реакцияңыз?
Ұнайды 0
Ұнамайды 0
Күлкілі 0
Ашулы 0

Серіктес жаңалықтары