Түркістандық сақалды әжей шетелдік БАҚ-ты сотқа беруді ойлап отыр

Бұл туралы Еуразия бірінші арнасы хабарлайды.

Түркістан облысының Тұрбат аулында тұратын Мұхтабар Тораева туыстарымен де, көршілерімен де жақсы қарым-қатынаста. Ауыл тұрғындары зейнеткерді құрметтеп, сыйлап, ақыл-кеңес сұрайды. Алайда шетелдік БАҚ кейуананы лаңкес деп атап, суретін жариялаған. Яғни, «Ислам мемлекетінің» лаңкестік топтарының лидерлерінің бірі Әбі Әли әл- Машхаданидің өлімі туралы жазған ирандық кей басылымдар оның суреті ретінде Мұхтабар әжейдің фотосын қолданған.

«Бұл қалай болғаны?! Егер мен сол лаңкестермен қандай да бір байланыста болсам, ең болмаса бір рет сол жаққа барсам жарайды. Ал олар аяқ астынан лаңкестік деп атады. Менің жасым 70-те. Құдаларым, туыстарым, көршілерім бар. Олардың алдында ұяламын», – дейді Мұхтабар Тораева.

Кейуананың сөзінше, барлығы сақал үшін болып отыр. Отандық БАҚ-та өзі туралы жазылғаннан кейін, шетелдік бұқаралық ақпарат құралдарында да Мұхтабар әжейдің суреттері пайда болған.

Ендігі Мұхтабар Тораева шетелдік БАҚ-ты сотқа беруді ойлап отыр. Алайда әлі нақты шешім қабылдамаған.