Азаматтық авиация комитеті Air Astana ұшағының Мәскеуге апаттық жағдайда қонғанын жоққа шығарды

Ведомство өкілдері «Air Astana» компаниясының мәліметтеріне сілтеме жасап, ресейлік және қазақстандық БАҚ-та пайда болған апаттық қону туралы ақпарат жалған екенін мәлімдеді. 

«2019 жылдың 16 мамырында КС873 рейсімен Нұр-Сұлтан-Мәскеу бағыты бойынша ұшуға тиіс ұшақ кейінге қалдыруға болатын ақауға байланысты 40 минутқа кешіктірілді», – деп түсіндірді комитет өкілдері.

Сондай-ақ, пайда болған ақаудың әуе кемесін қолдануға мүмкіндік беретіні баса айтылды.

Экипаж командирі Ресей астанасының әуежайында тежеу жолы ұзақтау болуы үшін ұшу-қону жолағын түгел берілуін сұраған.

Азаматтық авиация өкілдерінің сөзінше, ұшқыш барлық шектеулерді ескеріпті.

«Апаттық қону туралы ұшақ командирі жарияламаған. Қону штаттық режимде өтті, жолаушылар терминал түтігімен өтті», – деп мәлімдеді ведомствода.

Еске сала кетейік, осыдан бұрын Нұр-Сұлтаннан Мәскеуге ұшқан «Air Astana» компаниясының ұшағы Шереметьево әуежайына апаттық жағдайда қонды деген ақпарат тараған болатын.