Жаңа оқу жылындағы өзгеріс: мектепке жыныстық қатынасты түсіндіретін пән енгізетін болды

Пилоттық жоба биыл 9-сыныптан бастап қолға алынбақ. Одан кейін ол 8-6-сыныптар оқитын пән қатарына енгізіледі, деп хабарлады Adyrna.kz.

БҰҰ Халықты орналастыру қоры (ЮНФПА) Білім министрлігімен бірлесіп, мектеп бағдарламасына адамтану бағытында жыныстық тәрбие курсын енгізіп жатыр.

«Биыл біз бұл бағытта екі оқу орнымен әріптестікті бастадық. Атап айтқанда, бұл – орта мектептерге енгізілетін барлық курсты дайындап, ықшамдайтын Ыбырай Алтынсарин атындағы Ұлттық білім беру академиясы. Сонымен қатар, Назарбаев зияткерлік мектебі. Бұл арада қандай да бір жеке пән болмайды. Оған бөлек сағаттар бөлінбейді. Жаратылыстану, биология сияқты жалпы пәндерге тақырып ретінде арасында енгізіледі», – деді БҰҰ-ның Халықты орналастыру қорының (ЮНФПА) атқарушы өкілі Райымбек Сисемалиев.

2019 жылдың жаз айында мұғалімдер пилоттық мектептерде дайындық курсынан өткен. Мұндай өзгеріс 2019-2020 оқу жылында сынаққа алынбақ. Одан кейін барып, ол барлық мектептерде енгізілетін болады.

Айта кетсек, жыныстық тәрбие курстары Қазақстан мектептерінде соңғы бес жылда аракідік көрініс тауып жүр. Көбіне қалалық саламатты өмір салтын қалыптастыру орталығы сынды мекемелерден мамандар келіп, мектепке буклет таратып, өз дәрістерін оқып кетіп жүрген. Соның ішінде мүшеқаптың жарнамасы жақсы жүргізіледі. Мәселен, Алматыдағы бір мектептің ата-аналары бірер жыл бұрын бұған өре түрегеліп, өз наразылығын білдіріп, Білім министрлігін аяғынан тік тұрғызған. Балаларының қолына ұстатқан тест сұрақтары да олардың төбе шашын тік тұрғызған. Әсіресе, қазақ мектептеріндегі көп ата-ана жыныстық тәрбиеден гөрі, өз менталитетімізге сай «Әдеп» деген сабақты енгізген жөн ғой деп есептейді.