Назарбаевтың екі тұлпары да озды: Елбасы кубогы үшін 21-інші мәрте өткен бәйге сонысымен есте қалды

31 тамызда Алматы облысының Жамбыл ауданы «Көкбастау» ипподромында Қазақстанның бұрынғы президенті Нұрсұлтан Назарбаевтың кубогы үшін ҚР Конституция күніне арналған ұлттық ат спорты түрлерінен халықаралық жарыс өтті, деп жазады Qamshy.kz.

Алматы облысы әкімдігің ұйымдастыруымен өткен жарыста ат спортының үздіктері бәйгенің бірнеше түрінен және «Қыз қуу», «Аударыспақ», «Теңге ілу», «Жамбы ату» сияқты қазақтың ұлттық спорт түрлерінен сынға түсті. Аталған жарысқа Қазақстанның әр аймағынан және Қырғызстан Республикасынан әйгілі атбегілер мен белгілі шабандоздар қатысты.

Бәйгенің ең танымалы саналатын «Аламан бәйгеде» Нұрсұлтан Назарбаевтың немере інісі Әлнұр Назарбаевтың «Үшқоңыр» атты тұлпары бірінші келіп, бас жүлдеге тігілген шетелдік автокөлікті иеленді. Сонымен қатар, Әлнұр Назарбаев «Қарлығаш» атты тұлпарымен «Құнан бәйгеде» де бірінші орынды алды.

Қазақстанның тұңғыш президенті Нұрсұлтан Назарбаевтың жүлдесі үшін ат спорты түрлерінен халықаралық жарыс осымен 21-інші мәрте өтті.