Түркіменстан президенті ІІМ-ді 10 жыл басқарған Муликовты жұмыстан қуды

Түркіменстан президенті Гурбангулы Бердімұхамедов «қызметін асыра пайдаланды» деп басы дауға қалған елдің ішкі істер министрі Искендер Муликовті жұмыстан қуды, деп жазады Азаттық.

Бердімұхамедов министрдің қызметтен кеткенін 1 қазанда үкімет отырысында жариялады.

Бірер күн бұрын бас прокурор Батыр Атдаев есебін жариялап, Муликовтің «қызметін асыра пайдаланды» деген күдікке ілінгенін айтқан.

Кейін министрдің Ашғабаттағы мейрамханалары, кафелері мен дүкендері тәркіленіп, көлік жүргізушісі ұсталды.

Муликов Түркіменстан ішкі істер министрі болып 2009 жылы мамырда тағайындалған. Оның орнына осыған дейін министрлер кабинетін басқарған Мамметхан Чакыев келді.

Түркіменстанда министрлер мен сот органдарын жемқорлыққа айыптау өте сирек жағдай. Газ бен мұнай қорына бай Түркіменстан елін 2006 жылдан бері Гурбангулы Бердімұхамедов басқарып отыр. Ол 2017 жылы күштік құрылымдарды «тазартуға» тырысып, бас прокурорды жұмысынан алған. Сол кезде Бердімұхамедов Муликовке ресми түрде ескерту беріп, полициядағы жемқорлықты сынаған.