Ақмола облысының Ақкөл қаласы маңында жан түршігерлік жол апаты орын алды. Hyundai Elantra мен Toyota Carina автокөліктері соқтығысты. Жол-көлік оқиғасы Минск ХПП – Жаңа Қалқұтан ауылы автожолында демалыс күні болған, деп хабарлайды KAZ.NUR.KZ.
Облыстық полицияның баспасөз қызметі хабарлағандай, Степногорск бағытында келе жатқан Hyundai Elantra автокөлігінің 53 жастағы жүргізушісі рөлді игере алмай, жолдың қарама-қарсы бетіне шығып, Toyota көлігін соққан.
Өкінішке орай, жол апаты қайғылы оқиғамен аяқталды. 1987 жылы туған Toyota жүргізушісі мен оның алты жастағы баласы оқиға орнында көз жұмды. Сондай-ақ, осы көлікте отырған жолаушы – 1984 жылғы келіншек бас жарақатымен ауруханаға жеткізілді.
Сонымен қатар, Hyundai Elantra автокөлігінің жолаушысы – 1978 жылғы азамат зардап шекті.
Полиция аталған факті бойынша ҚР ҚК-нің 345-бабы, 4-бөлігімен қылмыстық іс қозғалғанын мәлім етті.