8 адам зардап шекті: Алматыда автобус пен жеңіл автокөлік соқтығысты

Алматыда автобус пен жеңіл автокөлік соқтығысып қалды, деп хабарлайды ҚазАқпарат.

Алматы полициясының хабарлауынша, жол-көлік оқиғасы 26 желтоқсан күні «Алатау-1» базары маңында болған. 44 жастағы «Mercedes – Benz» жүргізушісі солтүстік бағытында келе жатып қоғамдық көлікке соқтығысқан. 

«Жүргізуші маневр жасау ережелерін дұрыс сақтамай, оңға қарай бұрылып № 27 автобуспен соқтығысты. Салдарынан «Hyundai» маркалы қоғамдық көлік жарық бағанасына соғылып, арыққа түсіп кетті»,- деді Алматы қалалық ПД баспасөз қызметі. 

Апат салдарынан автобустың 8 жолаушысы түрлі дене жарақаттарын алды. Олар жедел-жәрдем көлігімен жақын маңдағы ауруханаға жеткізілді.