«Ұлттық тағамдарыңыз тамаша екен»: 141 елді жаяу шарлаған ливиялық саяхатшы Нұр-Сұлтанға да жетті

Әлемнің көптеген елін жаяу шарлаған ливиялық Нури Фунас Нұр-Сұлтанға келді. Ол Қазақстанға Жапониядан үш жыл бойы жүріпті, деп хабарлайды Almaty.tv.

Ливиялық Нури Фунастың төлқұжатында мөр қоятын орын жоқ. Ол бүгінге дейін бүкіл әлемді жаяу шарлап өткен. Ондағы басты мақсаты – Ливиядан бүкіл әлемге және әлемнен Ливияға бейбітшілік, татулық пен мейірімділік жолдауын жеткізу.

«Осылайша, мен дүниедегі мәдениеттің бәрін тани алдым. Бейбітшілік қана бәрін жеңеді. Соғыспен емес, бейбітшілік, татулықпен ғана бәрін шешуге болады деп ойлаймын. Осындай үндеуді айту үшін мен әлемдегі ең биік тауларға шығып, бейне жазамын. Мәселен, Африкадағы Килиманджаро, Непалдағы Эверест, Жапониядағы Фуджи тауларының биік шыңына шығып, үндеу жолдаймын», – деді саяхатшы.

Нури Фунас елорданың қақаған боранына түсіп қалған. Десе де, қазақ халқының айрықша қонақжайлылығы мен мейірімділігі жанымды жылытты дейді.

«Соңғы үш жылда Жапониядан Қазақстанға келе жаттым. Ең алғашқы қыс Кашмирде болды. Осылайша, бірнеше мемлекетті шарладым. Бірақ, Қазақстандағы суық ерекше. Нұр-Сұлтанға 3 шақырым қалғанда жүрісім қиындай түсті. Боран, қар. Бірақ, Алланың қолдауы мен қазақ халқының қонақжайлылығының арқасында аман қалдым. Қазақтың еті мен сорпасының арқасында десем де болады. Ұлттық тағамдарыңыз тамаша екен. Өте мейірбан халықсыздар. Өзімді қазір ливиялық емес, қазақтың баласындай сезінемін. Себебі, қонақта емес, үйдегідеймін», – деді Нури Фунас.

Әлемді жаяу шарлаған Нури Фунас бүгінге дейін 141 мемлекетте болыпты. Саяхатқа 1999 жылы шыққанда өзімен бірге дәл осы сөмкесі мен таяқшасын ғана алып шыққан. Ең алғашқы діттеген жері – Африка еліне 7 жыл бойы жүрген екен. Дәл осы саяхатты ол ең қауіп-қатерге толы болды деп отыр. Себебі, алдынан арыстандар мен жабайы пілдер сияқты аңдар шығып отырған екен.

Азияда ондай қиындықтар туындамапты. Бір-екі мәрте қасқыр кезіккенін айтады. Жаздың шіліңгір аптап ыстығына да, қыстың қақаған боранына да шыдап келген. Ал саяхаттауға қажетті тиын-тебен мен азық-түлікті сапарлаған елдер мен ондағы елшіліктер беріп, көмектеседі екен.

Бүгін Нури Фунас Қазақстандағы Ливия елшілігіне барып, өкілдерімен жүздесті. Кездесуде олар әлемдегі бейбітшілік, татулық сияқты құндылықтар төңірегінде әңгіме өрбітті. Еліміздегі Ливия дипломатиялық миссиясының басшысы қос елдің татулығының белгісі ретінде екі мемлекеттің туы белгіленген төс белгісін тақты.

«Ол саяхаттау арқылы бейбітшілік елшісі болып отыр. Бүгін міне Қазақстанға, әсем қала Нұр-Сұлтанға келді. Екі елдегі ауа-райы бөлек болса да, бүгінгі боранды қысты көріп отыр ғой. Қазақстан мен Ливия халықтары өте ұқсас. Біздің дініміз, адами құндылықтарымыз, үлкенді құрметтеу сияқты ізгілікті істеріміз жақын.

Сондықтан біздің отандасымыз татулықтың, достықтың үлгісін көрсетіп жатқанына қуаныштымыз. Қазақстанға татулық, бейбітшілік тілейміз! Өркендей берсін», – деді Қазақстандағы Ливия дипломатиялық миссиясының басшысы Ахмед Мефта'х.

Тағы оқи отырыңыз: «Қазіргі министр 380-мен зу ете қалады»: «қашпаймын» деп сөз берген, Ерлан қалай өзгерген?..

Қазақстан – Нури Фунастың Азиядағы соңғы нүктесі. Алматыға жаяулап барып, тауынан үндеу жариялаған соң, Ресей, Украинаға жол тартпақ. Ал бүкіл әлем бойынша саяхаты аяқталған соң, Нури Фунас Ливияға оралып, отағасы болуды армандап отыр.