Гүлнара Каримова 13 жыл 4 айға бас бостандығынан айрылды

18 наурызда қылмыстық істер жөніндегі Ташкент қалалық соты Өзбекстанның бұрынғы президенті Ислам Каримовтің үлкен қызы Гүлнара Каримованы 13 жыл 4 айға бас бостандығынан айырды. Оған "бопсалау", "қылмыстық жолмен алынған қаржыны заңдастыру" және тағы бірнеше бап бойынша айып тағылған. Сот сонымен бірге "Каримова құрған қылмыстық топтың бірнеше мүшесіне" үкім оқыды. Бұл туралы Өзбекстанның жоғарғы сотына сілтеме жасаған Азатттықтың Өзбек қызметі хабарлады.

Былтыр тамыз айында Каримоваға қатысты жаңа іс қозғалғаны белгілі болған еді. Бұл іс бойынша оған «мемлекетке тиесілі екі цемент зауытының акциясын сатып алды және оны кейін шетелдік бизнесмендерге сатты» деген айып тағылған. Желтоқсан айында "ашылған жайттарға байланысты" тағы бір қылмыстық іс қозғалды.

2019 жылы желтоқсан айында Өзбекстан билігі Гүлнара Каримованың швейцариялық адвокаты Грегуар Манжаға "адвокаттық этиканы бұзды" деп елге кіруіне тыйым салған. Бұл іс бойынша Гүлнара Каримованың қамауда болу мерзімі 2015 жылдың 21 тамыз айынан бастап есептелінеді.

18 наурызда сот бұған қоса "қылмыстық топтың" бірнеше мүшесін ұзақ жылдарға соттады. Екі айыпталушы "жауапқа тарту мерзімі өтіп кеткендіктен" қылмыстық жауапкершіліктен босатылды.

2017 жылы елдің бірінші президенті Ислам Каримов көз жұмғаннан кейін оның үлкен қызы Гүлнара Каримова 10 жылға бас бостандығынан айрылған. Ол кезде оған "салық төлеуден жалтарды", "ақша бопсалады" және "офшор компаниясының құжаттарын жойды" деген айыптар тағылды.

Каримова былтыр наурыз айында "үйқамақ тәртібін бұзғаны үшін" қайта қамалған еді. Биыл ақпан айының соңында өзіне қозғалған қылмыстық істі жабу үшін Гүлнара Каримованың қазіргі президент Шавкат Мирзияевқа хат жазып, мемлекетке 686 миллион доллар ұсынғаны туралы ақпарат тараған болатын.

Дереккөз: Азаттық радиосы