«Абай-175»: Сырдария ауданында әдеби-сазды кеш өтті

Ұлы ағартушы Абай Құнанбайұлының 175 жылдық мерейтойы жер-жерде кеңінен атап өтілуде. Осы айтулы мерейтой аясында Сырдария ауданындағы №44 орта мектепте «Әлем таныған Абай» атты әдеби-сазды кеш өтті, - деп хабарлайды Skifnews.kz ақпарат порталы.

Шара ақынның өмірінен алынған көріністермен басталды. Балалық шағынан даңқы шыққан кезге дейінгі көрініс көрермен жүрегіне жол тауып, әсерлі шықты. Абай ролін сомдаған мектеп оқушысы Айдын Әлихан «Айттым сәлем, Қаламқас» әнін нақышына келтіре орындады.

«Өткенімізді жаңғыртып, өшкенімізді ортаға оралтқан «Болашаққа бағдар: рухани жаңғыру» бағдарламасы ұлттық болмысымыздың бойына қан жүгіртті. Бұл шара – соның айғағы. Өскелең ұрпақ тарихта кімнің өткенін, оның елге қандай себі тигенін білу керек. Әлем Абайды қазақтың әр баласы жете танығаны жөн. Біз сол бағытта еңбектенудеміз», – деді ұйымдастырушы Зухра Өтепова.