«Үйде отырып шыдағын!..»: алматылық полицей көпшілікке ТЖ тәртібін сақтауды өлеңмен жеткізді (ВИДЕО)

Алматыда полиция қызметкері азаматтарды өлең оқу арқылы карантин тәртібін сақтауға шақырды, деп хабарлайды ҚазАқпарат.

Алматы қалалық ПД баспасөз қызметінің мәліметінше, «Үйде отырып күтейік» өлеңінің авторы – Арнайы және мобильді оқыту басқармасының аға инспекторы, полиция майоры Еркебұлан Корбозов.

«Бүгінде полиция қызметкерлері көзге көрінбейтін жау – короновирус инфекциясына қарсы күресте алдыңғы қатарда. Біз қалада енгізілген карантинді елемеу және санитарлық-эпидемиологиялық нормаларды сақтамау қаншалықты қауіпті екенін тәжірибеден білеміз.

Өкінішке қарай, қауіпсіздік шараларын қолданудың орнына серуендеуді, достарымен кездесуді қалайтындар да бар. Мұндайлар арнайы рейд кезінде анықталады. Бұл әрекеттердің қауіпті екені әрі құқық бұзушылық саналатыны күн сайын хабарланады.

Мен қолым боста шығарған өлеңнің көмегімен азаматтардың санасын оятқым келді, жағдайдың қауіпті екенін түсінуге шақырдым. Өлең бір сағатқа жуық уақытта дүниеге келді. Мен онда карантинді сақтаудың маңыздылығына азаматтардың назарын аударуға тырыстым», – деді Еркебұлан Корбозов.

Ол ішкі істер органдарында 2007 жылдан бері қызмет етіп келеді. Алғашқы білімі бойынша, мамандығы – мұғалім. Полицияда қызмет еткенге дейін, Еркебұлан шамамен 5 жылдай жалпы білім беретін мектепте қазақ тілі мен әдебиеті пәнінен сабақ берген. Ол бала кезінен өлең жазады.