Жаңалықтар 30.04.2020 сағат 18:00

«Індет елімізді әбігерге салды»: Елбасы қазақстандықтарды 1 мамыр мерекесімен құттықтады

Бұл – барлық этнос өкілдерін мемлекет құрушы ұлттың төңірегіне топтастыратын және тәуелсіздігімізді нығайтуға ықпал ететін бірегей институт.
«Індет елімізді әбігерге салды»: Елбасы қазақстандықтарды 1 мамыр мерекесімен құттықтады
фото: sputniknews.kz
Бөлісу
Бөлісу
Бөлісу

Елбасы Нұрсұлтан Назарбаев елді 1 мамыр – Қазақстан халқының бірлігі күнімен құттықтады. Бұл туралы Skifnews.kz ақпарат порталы, Тұңғыш президенттің баспасөз қызметіне сілтеме жасап хабарлайды.

Бейбітшіліктің ел үшін маңызды екендігін тілге тиек еткен Нұрсұлтан Назарбаев халыққа татулық тіледі.

"Баршаңызды Қазақстан халқының бірлігі күнімен шын жүректен құттықтаймын!

Бұл мейрам ұлттық болмысымызды айқындайтын асыл қасиеттеріміз – достықты, сенімді және патриотизмді дәріптейді.

Мен ширек ғасыр бұрын осы мерекені белгілеу туралы шешім қабылдаған едім. Өткен жылдар ішінде біз еліміздің көпұлтты және көпконфессиялы құрылымын стратегиялық артықшылығымызға айналдыра алдық.

Қазақстан береке-бірліктің арқасында түрлі қиындықты еңсеріп, бүкіл әлемнің құрметіне бөленді және мемлекет құру ісінде зор жетістікке жетті.

Бейбітшілік пен қоғамдық келісім әрдайым елдігімізді бекемдейтін қастерлі құндылығымыз болып қала береді.

Біз биыл Қазақстан халқы ассамблеясының 25 жылдығын атап өтеміз. Бұл – барлық этнос өкілдерін мемлекет құрушы ұлттың төңірегіне топтастыратын және тәуелсіздігімізді нығайтуға ықпал ететін бірегей институт.

Халқымыздың ырыс-ынтымағы тарих пен тағдыр сыйы ғана емес, әрқайсымыздың ерен еңбегіміз бен зор жауапкершілігіміздің нәтижесі.

Бірлік күні биыл әдеттен тыс жағдайға тұспа-тұс келіп отыр. Бүкіл әлемді жайлаған індет біздің елімізді де әбігерге салды.

Бұл сынақтан да сүрінбей өтіп, күш-қуатымызды одан әрі арттыра түсеміз деп сенемін. Осы жолда достық, бірлік, келісім және өзара қолдау қағидаттарын берік ұстанғанымыз абзал.

Баршаңызға мықты денсаулық пен бақ-береке, елімізге татулық пен толағай табыс тілеймін", - делінген Елбасының қазақстандықтарды құттықтау сөзінде. 

Оқи отырыңыз

загрузка...

Соңғы жаңалықтар

Аптасына бір рет ең танымал мақалалардың дайджесін жібереміз

Қызықты материалдар